Supercuts

Us irgenwelche Gründ, wo mir jetzt nümm ganz klar sinn, ha ich beschlosse gha zum Coiffeur zgo. "Supercuts", e beeidruggendi, professionelli Internetsitte und ganz in unserer Nöchi, hanni usgwählt.
Me goht ihne, nennt sie Vorname und wartet denn bis me ufgrueffe wird. Das passiert ziemlich schnäll, au wenn no mindeschtens vier anderi vor eim dra sinn. Mir isch nochär au klar worde, worum.
Me dörf denn Platz nä und schnäll schildere was me will (während däm foht sie scho fascht afo schniide: man merke, es muess schnäll go, schliesslich will me jo no mindeschtens 50 andere d hoor schniide vorem Füürobe). Ich ha ihre denn gseit, ich wölli dr alti schnitt wieder ha, vorne bitz länger und hinde gstueft (layers). Sie seit numme, "no layers, they give to much volume". Okay, ha denn nomol betont, " yes, layers, and longer in the front" sie: "longer in the front, that's what you want" ich "exactly, longer in the front"..guet..
Nachdäm sie mini Hoor mit emene Sprützflaschi nass gmacht het schniidet sie mir als erschts vorne d Hoor ab..wird also nüt mit vorne länger, dänggi numme, aber guet..sie weiss jo wohl was sie macht..sie sprützt no bitz mehr Wasser in d Hoor, bis die pflotschnass sinn, schniidet im Nacke mit eim Schnitt alles ab, holt e komischs Apparätli und schniidet d Nackehoor uf cm-Längi.Drbi seit sie, dass sie versuechi mi vorhäärige Schnitt no zrette, well dä sigi total falsch gmacht gsi..
Plötzlich heisst "ok, you're all set", sie risst mr das Schürzli wäg und seit ich könn go zahle..und das nach ca. 10 Minute!!!!
Ok: Für dä Priis (14 Dollar) ka me nüt sage, aber e wichtigi Verabredig dörf me do nachem Coiffeur nit ha (ha usgseh, wiene abschläggti Muus). Zum Glück hanni e Hietli drbika.
Jetzt hoffi eifach, sie waggse genau so schnäll wie nach Berlin und ha mr mol e paar Klämmerli kauft. Aber me gwöhnt sich jo an alles..
Hüt isch dr Martin au no zum Supercuts gange..är het Glück gha, es seht guet us..