Eigentlich hättis bi uns im Studio an dr Newbury Street au e Wöschmaschine..aber die isch immer nonig agschlosse und mir hänns ufgä em Verwalter Mails däm beträffend zschriibe.
Also simmer in e Waschsalon:
In däm Ruum hets ca. 30 Wöschmaschine und 30 riesigi Tumbler gha..genau wie die im Film "Identity", wo me in einere Szene e Kopf in dr Maschine seht :-(
Isch no e witzigs Erläbnis sone Wäschsalon. Ei Gang koschtet 2.50 und goht ca. 30min. Die Maschine duet und macht, es dönt mängisch ächt, als würds bald knalle..während däre zytt ka me au mol bitz d Lüt beobachte..
Eini het ca. 10 verschiedeni Wöschmaschine bruucht und 5 Tumbler..eine drvo isch speziell für rosa Wösch gsi..all 2 Sekunde het sie bi irgendeim d Tüüre uffgrisse und öbbis usegno, zums neume andersch wieder ihne due..muess e ganz usgeklügelts Syschtem gsi si..ich has nit durchschaut während däne 1.5 Std, wo mir dört gsi sinn.
Es het denn so schnittigi Wägeli, mit däne me ka d Wösch ummekurve (wie in Friends, wo dr Ross d Rachel ummeanderkurvt- was mir leider nit gmacht hänn :-( ). Mit däne ka me si Wösch vo dr Maschine zum Tumbler fahre, was bi däne Mänge, wo do anderi gwäsche hänn, au Sinn macht..
Well mir kei Ahnig vo tumblere gha hänn, hänn denn au mir die Tüüre ständig uffgrisse zum feschtstelle, dass das Züg immer nonig trocke isch..
Do drfür, dass es is so dermasse gstungge het zum go, hannis no ok gfunde..und es isch au gar nit so langwilig gsi, wieni dänggt ha..immerhin hämmer jetzt wieder früschi Sache..Was jo vor allem für dr Martin guet isch. Si Täsche mit sine Kleider isch nämlig immer nonig do...
Keine Kommentare:
Kommentar veröffentlichen