Fenway

unser neus Quartier

English Class

Hüt hanni mi scho mi letschte "Schueldaag" gha. Isch wahnsinnig wie schnäll die Zytt vergoht..bini doch immerhin e Monet jewils Mäntig bis Donnschtig am morge dörte gsi.

D Zämmesetzig isch wirklich luschtig gsi..die meischte sinn Fraue oder "Meitli" gsi, wo jewils mit ihrne Männer oder Fründe nach Boston ko sinn und uf Arbetsvise, Greencard oder Hochzytt gwartet hänn. Je länger je mehr mir zämme gsi sinn, desto mehr het me vo de Gschichte mitbiko und desto mehr bini mr vorko wie imene Desperate Houswife Sälbschthilfezirkel (NIT negativ gmeint).
Do hämmer mol einersits eini vo Russland gha, wo verzellt het, sie hoffi sie könni für immer in Amerika blibe, schwanger isch und uf d Hochzytt wartet. Dodrfür muess sie no e Interview absolviere, wo sie muess nochewiese, dass sie und ihre Fründ sich wirklich liebe (anhand vo Mails, Briefe etc..). Sie isch sehr e flissigi Schielerin gsi und het au immer alles allne vorbabblet und Antworte vornewäg gno het.
Denn gits no d Daisy, e Puerto Ricanerin..wo pro Stund ca. 4 mol usegloffe isch, oder telifoniert het.
D Somoya us Iran, het weder könne läse no rede (was wohrschins au mit dr andre Schrift zämmehängt) und immer gseit het "teacher, I have problem"..
Eini us Serbie, wo glaub nit sehr Amifän isch und sich jetzt doch für ihre Fründ entschiede het, wo sicher no e paar Jöörli dobliebe wird. Sie wärde jetzt denn hüroote drmit sie ka dobliebe. Do ihre Doktorgrad nit anerkennt wird, weiss sie nonig so rächt, was mache.
E jungi Frau us dr Dom.Rep..wo immer sehr härzlich useglache het und is mit ihrem Vortrag über ihres Land sehr niedisch gmacht het :-) Ihre Milchries vo dr Abschiedsparty isch dr absoluti Hammer gsi..
E Journalischtin us Kolumbie, wo alli grammatikalische Usdrück beherscht het und alles immer so erklärt het, dass mir andere nur dänggt hänn, oje, miessti das äggscht au wüsse?
Dr Yuki, e Japaner wo mi nach schwizerdütsche Sätz gfrogt het und sie denn mit mir giebt het uszspräche. Är ka zb sage: Rutsch mr doch dr Buggel ab, Bloos mr doch in d Schueh, Du bisch e glatte Siech und ächt? :-)
e Japanerin, wo mit ihrem Maa schomol 4 Joor in Jordanie gläbt het und dört nie elai het usekönne, geschweige denn öbbis schaffe. Sie isch die erschti gsi, wo e gmeinsams zmittag vorgschlage het und sehr härzigi Tipps gä het, wie " you have to speak about it, don't keep it inside"..
und nodürlich d Barbara. Dass mir is nit no agfange hänn Briefli schriibe erstuunt mi immer no. Mr sinn so richtig in Schuelalltag zrugggheit und hänn is ab Huusi gnärvt etc..:-)

Dr Teacher, d Janine, wo lieber vo ihre Tochter verzellt het und sich sälber gärn rede hört. Über das het sie denn mängisch vergässe, dass mir eigentlich do sinn zum rede lerne..jänu...unseri listening skills sinn ämel rächt gforderet gsi..
Usserdäm het sie is die amerikanisch Kultur nöcherbrocht und nodürlich isch immer alles the best in the world gsi..:-)

Es isch e luschtigi Zitt gsi und ich ha viel über anderi Kulture und Länder glernt, was immer wieder e schöni Erfahrig gsi isch. Und erscht s Buffet an dr Abschiedsparty...aber das isch e anders Thema:-)

Zügle mit U-haul

Sit am 24. April wohne mir jetzt neu an dr Queensberry Street in Fenway..Gaaanz noch bim Baseballstadion vo de Boston Red Sox. Die spiele, wenn sie do sinn, fascht jede Daag do und mir mien numme s Fänschter ufmache zum loose, ob sie am gwünne oder verliere sinn. Die Baseballwuet in däre Stadt isch eifach wahnsinnig..Fascht jede Daag isch e Spiel und die sinn immer usverkauft, jede het e Vollustattig vo Shirt über Cap bis zue de roote Söckli..Falls jemals öbber dr Film "Fever Pitch" gseh het...genau so isch es do..:-)

S Quartier isch relativ klei, nur paar Ströösli, het aber alles wichtige in unmittelbarer Nöchi. Inklusive enere Restaurant-Bar-Lounge, "church", wo me als Cocktail alli 7 Sünde ka bschtelle und wo am Wucheänd e Heavy-Metal-Konzärt gsi isch :-)

mr hänn e Türk, e Griech, Chinese, Burger, Mex-Tex food und ca. 5 Laundries, e riese Supermarkt, wo ich jewils total überforderet bi und nie weiss, welles vo däne 7oo Produkt ich nä söll..wieso gits do ca. 15 Sorte Creamcheese?

S Zügelwucheänd isch extrem asträngend gsi. Mir hänn a Lastauteli gmietet und sinn am 11i (obwohl mirs am 9i hänn welle) ahnebschtellt worde. Bis mir dört gsi sinn, hämmer ca. 1 stund miesse Bus fahre. Dört ako, isch is gseit worde, das Auti sig nit do.."wie nit do", " jo mir hänn halt keins meh"..unglaublich..hinde dra het e anderi reklamiert, well ihre öbbis ähnlichs passiert isch und s nit emol e kundedienscht git zum sich beschwere..d reaktion vom Typ "..ojoj (in babysprooch) calm down mama"..

hänn denn uf e nägschte daag e auti bschtellt..e Nummere grösser, well är gmeint het in s andere passt kei Sofa oder e Queensize Bed..Ob mir das scho am 8i welle..Hänn denn eins uf die 9i bschtellt, was sich im nochhinein als sehr weise usegschtellt het. Denn am nägschte Daag, het das Gschäft erscht efangs am 9i uffgmacht..zum Glück isch wenigschtens unser Auti do gsi..e riese Ding. Die schtelle eim das eifach ahne,löhn dr Motor laufe und sage bye now.

Das riese Ding isch rächt grobmotorig gsi und mir sinn in sehr stockender Art und Wiis über dä Parkplatz vor allne andere gfahre..Ich ha e Momänt Angscht gha, sie nämme is das Auti wieder wäg. Es isch mr generell seeeehr unwohl gsi und ich hätt dä Klapf am liebschte zruggä und hätt lo heimeliefere..aber als wie meh, hets dr Martin dusse gha.
d Päggli vom Ikea- das hätte mr eigentlich könnte wüsse- sinn sehr klei gsi, so dass d Grössi vom Auti e reine Witz gsi isch. Sogar s Sofa isch in Päggli ko..

Aber Foti sage do mehr wie Wort. Es het is ämel richtig gstungge, mit däm riese Auti wieder heime zmiesse mitem Wüsse , dass hinde eh "leer" isch:-).

Deheime ako, het dr Martin das Monschter sogar no in e Parklugge manövriert. Dr Vorteil isch, dass me jetzt im Martin wohrschins jedes Auti könnt ahnestelle..alles kei Problem meh, wenn me sone Teil gfahre isch..

This and That

Wenni scho nit eso viel schrib, gitts wenigschtens e paar Bildli

Zügle

1.Hilfe oder Schweizerflagge?

Was ich jo scho immer befürchtet ha, hanni hüt miesse bestätigt gseh:
Imene Drogerielade isch e First Aid buech ufglääge. Vorne druff isch e Huusapothek abbildet gsi mit em obligate Krüz vorne druff.. numme isch do e wisses Krüz uf rotem Hintergrund gsi..
Jetzt isch mir au klar, wieso mi d Lüt mängisch so blöd aluege, wenn ich mit mim Schwiizerkrüz-Rägeschirm ummelauf..Hoffentlich laufi nie an e Unfall ahne...