Barbara und Beat

E Wuche nach uns sinn d Barbara und dr Beat in Boston ako. Dr Beat macht wie dr Martin si Post-doc do in Boston. Allerdings bi dr Novartis, was e chli mehr härmacht :-) so hänn sie zb 1. Klass könne ifliege und hänn e eigeni relocation-managerin.

I finds super, dassi jetzt hin und wieder mit dr Barbara ka durch Boston schländere und mir is gegesitig könne wärtvolli Hussfrautipps gä :-)

No wichtiger isch is allerdings usezfinde, wos die beschte muffins oder cookies git...mir mache gueti Fortschritt.

Letschte Samschtig simmer zu viert ins Fire&Ice in Cambridge go ässe..Dört ka me allerlei Gmies, Fleisch, Fisch, Burgerzüg u.v.m in e Schüssle packe und amene riese Grill brötle lo.

Me het immer grad gseh, wo mir vier Schwizer unseri Portiönli ufem Grill hänn...(uf em Föteli rächts unde isch e CH-Portion im Verhältnis zue de andere zgseh) d Amis hänn ca. 4 mol mehr in die Schäleli biko..wie sie das mache isch is e Rätsel und do jo eh "all you can eat" für 16 Dollar isch hämmer is do witters au nit gross Gedangge drüber gmacht..

Randvoll hämmer is denn in die nägschti Bar gschleppt, wo mr für einigi neugierigi Blick gsorgt hänn, wo mr hänn miesse d identity card zeige..4 so riese roti Biechli falle nodürlich au uf (d ID wird do nit akzeptiert).

D Männer hänn wie sichs ghört 2 Samuel Adams gno. Für d Barbara und mi hets 2 riesigi Gläser mit Chardonnay gä..american size..sogar bim Wyy :-)

Spöter sinn mr denn no fotografiert worde (so à la Tillate) und hänn miesse unseri Name agä..Fabienne Heimgartner isch nit grad e Name, wo d Amis könne schriibe..sogar mi buechstabiere het sie nit verstande....ich: tschi (=g)..sie schribt e t..das isch ca. 5 mol so hin und här bis i gseit ha, i schribs sälber..velicht het sie gmeint ich heig e sprochfähler und mein wirklich t. Usser em Martin hänn mir alli unseri Name sälber gschriibe. Beat kenne scho die Dütsche nümme und Handschin isch au nit grad "easy" :-)

Am Donnschtig sött jetzt unser nätts Bildi im "Boston Now" erschiine. Wär jo dr Brüller..in Basel hannis no nie in e Zittig gschafft, für so Sache muess me halt scho uf Amerika. Velicht wärde mr no entdeckt und spiele im nägschte Grey's Anatomy mit?!