Rückblick: Cape Cod

Rückblick: Cape Cod

Im Septämber isch dr erschti Bsuech uf dr Matte gstande: Oli, Simone, Jolanda und dr Darko hänn is beehrt. Während d Jolanda s Glück gha het ihres Motelzimmer mit de zwei nätte Herre zteile, het d Simone mit unserer überdimensionale Matratze miesse Vorlieb nä.

Am Wucheänd vom Laborday simmer alli zämme nach Cape Cod düst..wobi düüse velicht im Fall vo Oli und Co bitz übertribe isch. Bis die drei ihres Mietauti hänn könne starte, hänn mir scho dr erschti Sunnebrand gha :-)
An däm Strand het me übrigens nüt dörfe mache: no running, no beach ball, no frisbee, no football, nonononono
am halb 5i het denn dr überus luschtigi Baywatch-verschnitt Uffsichts-Boy sini Starwarsmasgge uspaggt und verkündet, dass me no genau 15min Zytt für ufs WC het :-)

Unser Motel in Hyannis isch sehr suuber und zentral gsi. Zobe het me könne d Mainstreet uf und ab laufe und sich dr Buuch mit feine Sache vollschloh.

Do mir Autis gha hänn, simmer ganz Cape Cod abgfahre, bis nach Provincetown uffe. Ufgrund vom Laborday-weekend hets dört vo Lüt numme so gwimmlet. Unglaublich wie gstopft die Stroose und Hüüserverandas gsi sinn. Do het e Gruppe Cüpli kippt und dört hänn sie d Bäum im Vorgarte mit goldigem Lametta gschmüggt. Die Stadt isch voller Farbe und Kunst/Design"lädeli" und es git viel zum luege..

Ufem Wäg zrugg simmer no zue de Düne bi Head of the Meadow. Dos scho bitz kiehler gsi isch und e Windli gweiht het, isch dä Strand rächt leer gsi. E paar Verruggti sinn aber trotzdäm ins Wasser und als kräbsroti Zittergstalte zruggko :-)

Am Mäntig denn sinn Jolanda, Oli und Darko in Richtig Newport witter.
Do Wrentham uf unserem Heimwäg gläge isch, hämmer fascht vrbi miesse :-)Das isch e Outletdorf mit ca. 170 Läde!!! Für das hämmer denn sogar ca. 2 Stund im Stau gwartet..In däm Dorf sälber het sich die Masse an Lüt zum Glück e bitz verteilt, so dass me schön het könne shoppe (vor allem d Simone und ich :-)).

Wieder zrugg in Boston hämmer denn die Zytt mitemene Drink ufem Prudential (gwüssi hänn no schnäll e glaini Whiskydegustation mitgmacht) und emene Ässe bi Fire&Ice lo usklinge.

Merci nomol für Eure Bsuech, es isch super gsi mit Euch...und als Erinnerig hämmer jo no die wunderschöne Badtiechli vo Euch :-)